مغلق فتافيت - الفتفوتة الخامسة

[khaledmega]

الفتفوتة الخامسة

خالد :- السلام عليكم ؛ كان اخر فتفوتة وقفنا عندها كانت الديستنكت ؛ وكانت مهمتها هي عدم تكرار القيم عند استعراضها ؛ النهاردة – اليوم – ان شاء الله هناخد فتفوتة جديدة وهي الاولويات فى العمليات الحسابية ؛ يمكن المصطلح جديد على البعض وكمان هيبقى جديد فى الفكر ايضا لكن هو بسيط ؛ تعالي نفهم الموضوع ببساطة
طالب :- ياريت .
خالد :- الامر ببساطة ان هناك اشكال محددة كلنا نعرفها فى العمليات الحسابية وهي الجمع والطرح والضرب والقسمة ؛ مفيش – لا يوجد – حاجة جديدة غيرهم ؛ لكن فى حقيقة الامر التعامل معهم مختلف فى حالة اذا ما استخدمناهم مع بعضهم البعض
طالب :- ازاى يعني ؟؟
خالد :- تعالي نشوف مثال عملى

5 + 2 * 10 = 25
5 * 2 + 10 = 20

ايه اللي حصل ؟ النتائج مختلفة علشان فيه قواعد فى التعامل مع المعاملات الحسابية بمعني ان الضرب والقسمة لهم الاولوية عن الجمع والطرح .
طالب :- مش فاهم حاجة !!!
خالد :- ببساطة لما يكون فى عملية حساب رياضية وهذه العملية فيها معامل جمع وضرب مثلا فالقاعدة تقوم بعملية الضرب قبل الجمع فلما ضربنا مثال وقلنا

5 + 2 * 10 = 25

اللي حصل انه تم ضرب 2 * 10 ثم قام بجمع الناتج مع 5 وكانت النتيجة 25 وهو ده المقصود بالاولوية انه يقوم بالضرب اولا ثم الجمع رغم ان معامل الجمع قبل الضرب ؛ على نفس القياس فى عملية القسمة والطرح نجد ان القسمة تسبق الطرح ؛ هذا الكلام يتطابق بين الاربع حالات فاذا ما تقابل الضرب والطرح فى عملية حسابية واحدة فان الضرب يسبق الطرح وكذلك القسمة والجمع ؛ اذا فى النهاية الضرب والقسمة يسبق التعامل معهم قبل الجمع والطرح
طالب :- طب والحل فى المشكلة دي ؟
خالد :- مين قال ان فى مشكلة !! علشان نحل الموضوع ده بنضع اقواس للي نحب يتم حسابه اولا
طالب :- مش فاهم حاجة !!
خالد :- لو فرضا انا محتاج ان عملية الجمع او الطرح تتم قبل القسمة او الضرب فيجب علينا وضع ما سيتم جمعه او طرحه بين اقواس ؛ تعالي نشوف مثال :-

(5+ 2) * 10 = 70
(10+ 2) * 5 = 60

طبعا الوضع اختلف تماما فى النتيجة لكن الشاهد فى الكلام انه كيفية استخدام الاقواس لتحديد اولويات العمليات الحسابية .
تعالي نشوف فتفوتة جديدة فى العمليات الحسابية وهي كيفية استخدام العلامة العشرية او النسب المئوية ؛ قالك هناك طريقيتين لاستخدام معامل النسب المئوية ؛ الاولى انك تستخدم الدوت " . " ؛ والطريقة الثانية هي القسمة على مئة ؛ تعالي نشوف :-

SELECT SAL * 0.1  FROM EMP ;
SELECT SAL * 10/100  FROM EMP ;

فى الحالتين النتيجة واحدة ان شاء الله ؛ ولك حرية الاختيار فيما يتناسب معك .
حاجة اخير لازم تاخد بالك منها الا وهي الدوال الحسابية على مدارات زمنية مختلفة ؛ يعني لما يقولك عايز المرتب السنوى فهذا يعني انه عايز المرتب مضروب فى 12 شهر وذلك لان العام يحتوي على 12 شهر ؛ تعالي نشوف :-

SELECT SAL * 12  FROM EMP ;

توضيح لبعض الرموز المستخدمة فى الاوراكل عموما :-
. 'الدوت' وهى تستخدم للفصل بين اسم الجدول واسم العمود :

select emp.ename from emp ;

_ الاندر سكور وتستخدم للفصل بين الاسماء اذا كان اسم العمود اكثر من كلمة :-
Usr_name
, الكومة او الفاصلة وتستخدم للاستعلام عن اكثر من عمود او جدول فيفصل بينهم بالفاصلة

select ename , sal from emp ;

; سيمي كولمن وتستخدم لغلق اى كود فى الاوراكل ومن دونها لن يعمل الكود .
' ' السنجل كوتيشن وتستخدم للاستعلام عن بيان حرفي داخل الداتا بيز او ادخال بيان حرفي داخل الداتا بيز

select sal from emp where ename = 'KING' ;

طالب :- جميل الكلام ده !!
خالد :- تعالي نشوف فتفوتة تانية .
عملية ترتيب النتائج المعروضة ؛ فرضا لو انت عايز ترتيب الناتج من استعلام ما زي المرتبات .
طالب :- مش فاهم حاجة ؟
خالد :- اى ناتج يعرض على الشاشة هناك امكانية ترتيب الناتج بثلاث اشكال الاول المخزن عليه كما هو فى الداتا بيز والثاني تصاعدي والثالث تنازلي ؛ اما عن الثاني والثالث فأنت المتحكم فى الامر ؛ تعالي نشوف مثال على الثاني مثلا فلو انت تريد عرض المرتبات من الاصغر للاكبر فهنا نستخدم دالة ASC ؛ تعالي نفهم الامر ببساطة شوية ؛ اى بيانات محفوظة غالبا بتكون يا ارقام يا تواريخ يا حروف طبعا فى انواع من الداتا تانية كتير غير دول لكن خلينا نقول ان دي اشهر الانواع المتعارف عليها ؛ فبيقولك بالنسبة للارقام فالترتيب بيكون على الرقم وهو ان يظهر بالشكل التالي 123456789 او انه يظهر بالعكس 987654321 وهذا هو المقصود بالترتيب من الاصغر للاكبر والعكس ؛ طيب لو عايزين نظهر البيانات مرتبة ولكن هي فى الاصل حروف قلك هيظهر اما
ABCDEF
FEDCBA
طيب لوانت عايز من الصغير للكبير هيكون الشكل كالتالي :

SELECT SAL FROM EMP ORDER BY SAL ASC ;

المقصود هنا بالاوردر باى هي دالة الترتيب نفسها وكان الاوراكل لما بيشوفها بيعرف انه مطالب انه يبدء فى الترتيب اما كلمة ASC فهو يعني من الصغير للكبير
قالك لو بدلت كلمة ASC بكلمة DESC فهذا يعني الترتيب بشكل عكسي كالتالي :

SELECT SAL FROM EMP ORDER BY SAL DESC ;

كمان ممكن تنادي وتنفذ الترتيب بطريقة تانية ؛ بمعني ان لو كانت جملة السليكت فيها اربع حقول وانت تريد ان تظهر النتائج مرتبة حسب الحقل الثالث فيمكنك ان تفعل ذلك من خلال الاشارة برقم ترتيب الحقل فلو لدينا جملة استعلام بها حقل الاسم والوظيفة والمرتب والعمولة وانت تريد ان تقوم بترتيبهم حسب المرتب وهو ترتيبه الثالث فيكون الشكل كالتالي :

SELECT ENAME , JOB , SAL , COMM 
FROM EMP ORDER BY 3 ;

بالشكل ده لو عندك عشر حقول وانت عايز تعرض بالحقل السابع فكتب اكتب 7
تمام ؟
طالب :- تمااااام .

[center]م / خالد الشاذلي
مبرمج اوراكل بوزارة الانتاج الحربي 
IT Manager 1Solution Group 
0122512071
[email protected] 
[email protected][/center]

تم تعديل 19 أكتوبر 2009 بواسطة khaledmega

[@nana@]

بجد مش عارفة اقول ايه

واكيد لو قولت مش هيكفى بجد

بجد شرح ممتاز

وكمان بشكر حضرتك جدااا ع موضوع الغرفة المجانية ف وان سيليوشن

[عبداللطيف]

الف شكر اخي خالد - كما عودتنا موضوع متميز نحتاجه دائما.

[King Oracle]

احسنت اخي العزيز م خالد الشذلي تابع على بركة الله .....

[Amgad]

السلام عليكم ورحمة الله

شكرا للأخ / خالد ... على الفتفوته الخامسة

للعلم : الفتفوته الخامسة .... موجودة حاليا مع باقى الفتافيت الاربعه ... فى موضوع واحد "مثبت"

إضغط هنا :فتافيت ... كورس الاوراكل بشكل جديد